ميكروباص

كالعادة فى الصيف شغلى دايما بيتطلب منى انى اسافر لكذا محافظة داخل مصر

من يومين كنت مسافر شبين الكوم فى محافظة المنوفية واخدت ميكروباص من عبود ودخلت قعدت وكله تمام التمام والميكروباص حمل والعملية ماشية حلو وتعالى يا عم الاسطى اطلع بينا ابص الاقى بنت حلوة كدة بتاع خمسة وعشرين سنة هاتركب وتسافر بينا انا قلت ربنا يستررررر دورت العربية وطلعت ولا اجدع سواق وطير بينا ياسطى عالكورنيش اصدى عالطريق الزراعى - البنت متمكنة وواثقة من نفسها وطبعا خد تعليقات من العربيات اللى حوالينا زى على مهلك شوية يا عم علينا وبالراحة شوية ما تجريش وواحد بتاع بيجو رخم عليها راحت طالعة منه بحتة احترافية كدة وبصتله بصة حقارة وطبعا كل اللى يشوفها يتنح واحلى حاجة ان الكرسيين اللى جمبها كان فيه بنات برضو يعنى القيادة كلها كانت حريمى واحنا قاعدين بنتشاهد ورا وكمان ما دفعتش كارتة والراجل شاورلها قالها خلاص وكل امناء الشرطة عالطريق عارفنها يعنى بصراحة اللى مستعجل يركب معاها عمره ما هايقف فى الطريق ولا عشان كارتة زلا عشان لجنة والحمد لله وصلنا بسلامة

هو ده حالك يا مصر بناتك سواقين ميكروباظ (ميكروباظ بال ظ)ه