الهدف
الهدف
يااااااا كلمة تقيلة أوى على قلبى بتضايق جداً لما بسمعها وده لأهميتها فى حياة اى انسان وبتضايق أكتر مع قرب نهاية دراستى الإجبارية المملة ولسة لحد دلوقتى ما حددتش هدف واحد أوصله والمشكلة الأكبر انها أهداف مش هدف واحد بس هى عبارة عن هدف رئيسى متفرع منه أهداف فرعية أخرى .... بتضايق منها لأنى مش عارف الاقى لها مكان فى حياتى كل لما الاقى ليها مكان الاقيها هربت منى مع ضغوط الحياة حاولت كتير أثبتها ولكن كل مرة بتهرب مش عارف أعمل ايه بجد .... قلت لنفسى كل مرة أقول انا هاقف وقفة جادة مع نفسى ومش هاينفع كدة وسرعان ما أتكاسل وابتدى أنسى مع الوقت انا حددت ايه اصلا وده نتيجة خوف من داخلى انى احدد هدف وما اعرفش أوصله فى النهاية ياااااااا الاحساس ده بيتعبنى جدا تفتكروا الوقت هايعدى منى وأخسر فى الاخر بسبب انى ما حددتش هدف أوصله ولا لسة أدامى وقت كافى وإن فى غيرى ما فكرش حتى ان فى حاجة اسمها هدف .
بجد ساعدونى بأنسب طريقة أقدر أحدد بيها هدفى وإحكولى كمان هل انتوا قدرتوا تحددوا هدفكم ولا لا... ومنكم نستفيد ولك الثواب عند الله يا فاعل الخير .
هو مال البوست قلب شحاتة كدة ليه؟ هههههههههههههه ... يلا أنا مستنى
posted by m_elsewedy @ 7:37 PM
12 comments
12 Comments:
الهدف كلمة صغيرة الحروف لكن كبيرة المعانى الانسان بعيدا عن عدم تحقيق الهدف او تحقيقية ما يقدر يعيش من غيرة لان الهدف جزىء من حياة الانسان يحلم بالتحقيق وانة يكون واقع ولكن احيانا يكون الهدف اكبر من قدرات الانسان فيفشل الانسان فى تحقيقية مما يصيبة اليأس والاحباط من عدم وصولة الى ما يريد.
من الجميل ان يكون لينا هدف ونحققة ونبحث عن هدف اخر اهم حاجة يكون مناسب لقدرتنا الشخصية حتى نستطيع ان نتجاوب معة ويتجاوب معنا
هنا فقد اذا فشل الانسان علية المحاولة مرة وعشرة ويتعلم مما فات وطول ما فية تصميم وارداة على الوصول الى هدف ما هنوصل
لاتياس مما فات وانظر الى المسقبل بنظار ابيض شفاف مهما كان السواد هيروح ويذوب امام التصميم والارادة القوية
اشكرك عزيزى سويدى على البوست الاكثر من رائع
ربنا يوفقك ويهنيك
الى الامام
سبحان الله أنا بقا خلصت الجامعة بقالي سنتين و لسة محققتش هدفي و صدقني كتيير بنسى إني أفكر في طريق يخليني أحققه بس إوعى تكتئب من كلامي أو تفقد الأمل
ربنـــــــــا كبيــــــــــــــــر
قادر عل تحقيق كل أهدافنا بس المهم إن إحنا نحتسب كل شيء لوجه الله
I hope you're all safe with all this violence going on!!
(Omni respects all religions)
فكر ايه اللي انت بتحبه و ايه اللي انت عايز تعمله وهتكون سعيد وانت بتعمله وساعتها هتحدد هدفك
الموضوع صعب شويه بس مش مستحيل حاول و جرب مره واتنين وعشره و متفقدش الامل انك تلاقي اللي انت عايزه وتقول اهو شغل والسلام
ربنا معاك انشاء الله هتوصل مدام بدات تفكر في اهدافك بدري كده
انا وانا قدك كده كان كل املي اتخرج وبعدين ربنا يحلها
:)
شكرا ليك تامر على الكلام الجميل ده وبحاول على اد ما اقدر اتعلم من اللى فات وبحط دايما أمل انى اوصل
تحياتى ليك
taty
منورانى انتى وبسبس دايما والله
:D
والله انا بحاول وكلى أمل فى الله هو القادر على كل شىء
وإن شاء الله انتى كمان تحققى كل أهدافك
bosbos
برضو منورانى انتى وتاتى
:P
انا بقى يا ستى كل ما افكر فى هدف حاجة تانية تشغلنى واقول خلاص انا هاركز فيها وحاجة تالتة تشغلنى وابعد عن الحاجتين التانيين لغايت ما احوليت
:D
قال يعنى بقى الشغل مقطع بعضه بس عامة يعنى انا دلوقتى فى مجال البيع بس انا مش حابب البيع خالص بس ماليش شغل غير كدة دلوقتى
واللى معجزنى انى انفذ اى حاجة هو انى لسة ما خلصتش دراسة بس كل ما افتكر هاعمل ايه او هاركز فى ايه اخاف
عامة ربنا يسهل وان شاء الله انتى كمان تحددى هدفك
طيب يا ابني ما تستنى تخلص دراستك الاول و بعدين تفكر في الشغل
انا مش بقول ان الشغل خلال الدراسه حاجه وحشه بالعكس بيدي خبره و يقوي الشخصيه و بيعلم الاحساس بالمسؤليه
بس رتب اولوياتك يعني دلوقتي ركز انك تخلص دراسه و بعدين فكر في الشغل براحتك
ده مش معناه انك تسيب شغلك الحالي بالعكس لو حاسس انك قادر توفق بينه و بين دراستك كمل بس متشغلش نفسك كل شويه تدور على شغل جديد لحد متلاقي الشغل اللي بتحبه
بعد ما تتخرج هتلاقي الطريق الصح اتفتح قدامك و ساعتها هتكون عندك الخبره الكافيه من خلال شغلك الحالي عشان تحدد انت بتحب ايه
و ربنا معاك
كلامك جميل والله يا بسبس انا فعلا لازم اركز انى اخلص الاول وبعد كدة هابتدى اركز فى حاجة معينة وربنا يسهل بس هو زى ما تقولى كسل بس عن المذاكرة وانشغال اكتر فى الشغل هو مش عدم توفيق ما بينهم هو قلة مذاكرة بس
:D
شكرا ليكىىىى
سويدى
انت جيت ع الجرح
انا حاسة انى ماشية بتخبط فى كل اتجاه..... وكل ما اقول خلاص حققت هدفى وقربت منه.... لا أكتشف انى كنت فى الاصل ببعد.... يا اما بقى -ودا الاغلب- الاقينى كنت متخيلة هدفى شئ احسن من الواقع بكتيييييير..... فأحبط جدا
نفسى حد يدلنى على عنوان "حدد هدفك فى الحياة" قبل ما تخلص
اعفيني من التعليق لأنه حيبقى في الاتجاه المعاكس للهدف
لست أدرى
احنا الاتنين فى مركب واحدة واول ما تلاقى هدفك قوليلى على طووووووول عشان ترفعى من روحى المعنوية
:D
تحياتى ليكى وشكرا على مرورك
change destiny
طبعا شكرا على مرورك
بس كنت عايز اعرف هايبقى تعليقك هايبقى عامل ازاى فى الاتجاه المعاكس
:D
العزيز سويدى : اولا تحياتى لك
على تفكيرك فى اهدافك فى الحياة
انا لن انقل لك تجربتى لان الظروف مختلفة طبعا ولأن الهدف دا انت فقط اللى تحددة دون معينات من احد
ولن انقل التجربة ايضا لان اهدافى كلها متعثرة
بس اهم حاج تعمل لنفسك رسالةمكتوبة : الهدف من وجودك
وبعدين تعمل رؤية عملية
لمدة خمس سنوات يعنى انت بعد خمس سنوات ما الحلم اللى انت شايف نفسك تكون فىه بس اهم حاجة ان الحلم يكون عملى ومش خيالى
وبعدين فى حاجة اسمها التحليل الرباعى يعنى عشان منصعبش الموضوعات
استحملنى شوية
يعنى تحلل نفسك تشوف نقاط الضعف اللى فيك ونقاط القوة وتكتبها وتحاول تقلل من نقاط الضعف وتتغلب عليها وتعتمد على نقاط القوة اللى فيك وتحاول تعظمها
وبعد كدة تشوف الفرص المتاحة اللى قدامك وتكتبها وتحاول تستغلها
وبعد كدة تشوف التهديدات اللى ممكن تواجهك وتدرسها كويس وتحاول تتلافاها
واهم حاجة انك تكتب دا كلة
بعد كدا تبتدى تحدد الاهداف بناءا على الرسالة وتشوف الاولويات والاهم اولوية تكتب تحته مجموعة من الاهداف الفرعية وكل هدف فرعى تحد له فترة زمانية ..
وتبتدى تكتب الخطة وتلتزم بيها اللى هيا عبارة عن مجموعة من الانشطة وتندرج تحت كل نشاط خطوات تنفيذية
بس لازم تحدد فترة زمنية للتنفيذ
وتقيم نفسك كل فترة وتشوف انت وصلت لغاية فين
بس المهم كل دا يكون مكتوب
وتحاول تلتزم بيه العملية هاتخبط معاك فى الاول بس هاتحس انك انجزت حاجة
ومتيأش
لسة قدامك كتير
وتحياتى
Post a Comment
<< Home