ومازال الإستنزاف مستمر
مش عارف أنا ايه ده !!!م
ماشى إمبارح فى امانة الله رايح درس فى المنيل وبتمشى دايما من محطة مترو السيدة زينب لحد منتصف شارع المنيل كدة ، أوم ايه ابص حوالية كدة الاقى حاجة أصفرة كدة معدية أدقق شوية أبص الاقى مكتوب عليها (كايرو كاب) بالإنجليش ولا عزاء للتاكساجية طبعا لا عزاء للتاكساجية دى من عندى عرفت ان ده مشروع تاكسى العاصمة أو بمعنى أصح مشروع استنزاف المبلغ الصغير المتبقى من راتب الموظفين الذين لا يملكون سيارات ملاكى عشان يخلصوا على المرتب كله وبلا وجع دماغ وتحويش وكلام فارغ من ده تحويش ايه يا راجل!!!م
للى ما يعرفش تاكسى العاصمة ده عبارة عن تاكسى مكيف وجديد لانج بكارتونته سيادتك تتصل بيه يجيلك فى أى حتة ومزود بعداد ديجيتال عشان يمص دمك فى التوصيلة وطريقة المحاسبة بالكيلو متر أول كسر للعداد حوالى تلاتة جنيه وبعد كدة كل كيلو بجنيه يعنى انا مثلاً لو ركبت الحتة اللى بمشيها دى بتاكسى عادى من محطة مترو السيدة لشارع المنيل ب إتنين جنيه ولو ركبت تاكسى العاصمة هادفع سبعة جنيه هيييييييييييييييه يا فرحتى....م
طبعا يا جماعة لا تعليق ومشروع مالوش اى لازمة وهايعمل زحمة فى الشوارع اصل انتوا عارفين ان شوارع القاهرة واسعة جدا وفااااااااااااضية واللى فكر فى المشروع ده قال ازحم الشوارع شوية لحسن الاجانب يقولوا هما اهل البلد عزلوا منها ولا وايه؟
وسلام بقى عشان نازل الناصية الجاية ..... على جمب يا اسطاااااااااااا
posted by m_elsewedy @ 7:06 PM
16 comments
16 Comments:
شفت يا سيدي أديك حصلتني . مبروك . بس بصراحة ختامها مسك
ميرسىىىىىىىىىىى
بس انا كل مرة بنسى اسمع البرنامج ده اصلا
:D
سيدي يا سيدي
وكمان وصلت للاعلام ده انت وصلت خلاص و محدش هيعرف يكلمك بعد كده
بص هو في موضوع تاكسي العاصمه ده انت اكيد عندك حق بس منقدرش ننكر انه هيحسن الشكل العام للتاكسيات و هيفيد بعض الناس مش كلهم
إحم إحم إستنى بقى لما أعدل ياقة القميص عشان اعرف اتكلم
:P
يلا عقبال ما اشوفك كدة طالعة فى صباح الخير يا مصر ههههههههه
أما بالنسبة لتاكسى العاصمة هو اه شكله حلو وبيحسسنى ان انا فى نيو يورك بس والله حاس انه مالوش اى لازمة
إنت كنت فين المدة دي كلها؟
سويدي أنا فعلاً شفت التاكسي دة امبارح في مدينة نصر أنا فعلاً حاسة إنه مالوش لازمة و هو فعلاً إستنزاف لفلوس المواطنين بس أنا مش عارفة هما هيلغوا التاكسي بتاعنا العادي دة والا ايه؟
تاتى
انا الحمد لله بخير بس كل يوم برجع متأخر يادوب اخد جولة سريعة كدة وانام
:D
الحمد لله انى لاقيت حد يأيدنى ويقول انه مالوش لازمة
لكن التاكسيات القديمة هاتفضل زى ما هى هاتروح فين
:D
مبرووووك يا واد العالميه(العربيه) طبعا و عقبال العالميه بجد ...الموضوع في الجون ياواد وطبعا مش هاقلك
كنت فاكرك فارس ياواد ولكل فارس كبوه
لكن طلعت أسد ياواااد......انت عارف
الباقي طبعا ....العاقبه عندكم في المسرات
ميرسى كتير يا نور بس لما اشوفك
:@:D
هلا سويدى
كلامك مظبوط
المفروض ان تاكسى العاصمة يكون بديل مريح من الناحية المادية ايضا وليس الامكانيات والشكل فقد
كما قال المسئؤلين انة حل للزحمة وفى صالح المواطن لكن فعلاا هو العكس وكما قولت لو مشوار بيتكلف 2 جنية اية اللى يخلينى ادفع فية سبعة
دة ضحك على الدقون ولا فية مصلحة للناس المصلحة للحكومة واصحابها رجال الاعمال
تسلم ومشكوور على البوست الرائع
.
ربنا يوفقك
الى الامام
تامر شكرا على كلامك الجميل
:)
ايه يا عم ؟ فينك؟ محشور في تاكسي في اشارة مرور ولا ايه؟
هههههههههههه لا مش محشور ولا حاجة انا موجود
شكرا على سؤالك
:)
وانت ازاي اصلا تفكر تركب تاكسي سيتي كاب ولاّ حتي بلاك اند وايت كاب
انت مش عارف ان الحاجات دي للناس المرفهين الوحشين دول..
عندك حق والله أؤيدك جدا انه مالوش لازمه أنا شفته هنا في اسكندريه كمان ز. هو الفائده الوحيده له انه شغل شباب كتير وكلهم خريجين جامعات بدل مايقعدوا عالقهاوي لكن انا شخصيا ماركبوش الا لما احب اعمل نفسي هاي ومرفهه عشان بس اتفرج عليه
هههههههههههه
ايوة كدة خليكى عاقلة واوعى تعملى نفسك هاى ومرفهة
:P
تاكسي العاصمة من أحسن المشاريع التي تقدم خدمة مميزة عند الضرورة - مش لازم ياأخي لما تكون رايح لواحد صاحبك أو رايح النادي أو السينيما تركب التاكس
وفر التاكس للمشاوير المهمة مسافر مثلا ووراك ميعاد طائرة أو إنت والعائلة رايحين مناسبة مش لازم تكون لواحدك إحسبها لو أربع أشخاص حيدفعوا كام للتاكس مش لازم كل واحد رايح مشوار يتمطع في تاكس لواحده
Alex Lord
Post a Comment
<< Home