الشعب المصرى المحتاس
إمبارح كنت فى عروس النيل مدينة المنصورة الجميلة وبعد ما خلصت شغل هناك وانا فى طريق العودة حجزت تذكرة فى اتوبيس شرق الدلتا وصعدت للأتوبيس ووجدت الآتى
لاقيت ان ارقام الكراسى اللى بتبقى مكتوبة فوق ممسوحة كلها او بمعنى اصح مش مكتوبة خالص من اصله فتخيلوا بقى كمية الناس المحتاسة جوة الاتوبيس وكنت انا واحد منهم بس الحمد لله واحد انقذنى وقالى الارقام مكتوبة على ضهر كل كرسى انا كنت ناسى الموضوع ده والحمد لله قعدت فى مكانى بسرعة اما بقيت الناس ماحدش عبرهم فا تخيلوا بقة الهرجلة اللى حصلت فى الاتوبيس ده يقوله ده مكانى، انا عديت الكراسى، وده يقوله ماليش دعوة انا، خلاص شوفلى فين الكرسى بتاعى وانا اقوم وكانت ليلة والاتوبيس اتأخر بتاع نص ساعة وانا ميت من الضحك فين وفين لما السواق طلع وبقى ينظم، اخر ما زهق بقى يزعق للناس كمان اكنه مراقب فى لجنة امتحان
تخيلوا حاجة بسيطة زى دى خلت الناس تلف حوالين نفسها
34 Comments:
بدل ما تقعد تضحك عالناس اكسب فيهم ثواب و قولهم ان النمرة مكتوبة على ظهر الكرسي زي ما الراجل قالك
انت شرير على فكرة
يا سويدي اكتبلي ايميل ياهو عشان ابعتلك عليه فطومة
يا تاتى ماهو الاتوبيس كبير اوى وانا هافضل اقول لكل واحد؟
:D
ثم انا اكتفيت انى اقول للراجل اللى جنبى لانه كان قاعد غلط ومصمم ان الرقم اللى ادامه على الكرسى
بتاع الكرسى اللى ادام مش اللى هو قاعد عليه يعنى هو فاكر ان كل كرسى رقمه مكتوب فى ضهره مش ادامه
فهمتى حاجة؟
:D
فا لما لاقته كدة قلت اقعد اتفرج افضلى لغايت ما جه صاحب الكرسى واقومه غصب عنه
ايميل الياهوو
m_elsewedy20@yahoo.com
بس يفضل تبعتيها على الهوت ميل انا عندى الهوت ميل مساحته كبيرة جربى عليه الاول
m_elsewedy@hotmail.com
عااااااااااادي يا سويدي
يعني هي جت على الأتوبيس
ما هي كل حاجة بايظة :)
القصة دى لسة زى ما هى من عشرتاشر سنة
يعنى ايام ما كنت باركب الاتوبيس من بلدى للكلية
:)
نفس العته لا يغيره الزمن
ياد انت اللي شرير وقلت اتفرج عالناس وهي بتولع في بعض وتقعد تضحك مش بقولك شرير.......
عايز الحق انا لو مكانك كنت عملت كده وكنت هاطلع الكاميرا واصورهم كمان كوميديا ببلاش ياعم
كمنصوراوي أرى أن "المرح" و "الإثارة" يبدآن من ركوب الميكروباظ من المنصورة أو إليها من أي محافظة أخرى ، وستتضاعف الإثارة عندما تركب أي تاكسي من بورسعيد إلى المنصورة .. خط لذيذ وكوميدي بصحيح .. خصوصاً سواقينه .. ياااااي.. لذاذ طحن..
مرة كنت راجع لأجازة من تجربة شغل فاشلة في بورسعيد .. أبص ألاقيلك البيه المحترم مفيش إزاز مفتوح عنده في العربية .. وبمجرد النظر راسه وألف باتا قديمة ليقعدني في الكرسي الوراني خالص اللي ما فيش فيه إزاز بيتفتح .. الكلام دة في عز يولية..
إذا كان بعض مدرسي الفيزياء تحديداً بيصفوا البيجو بأنه نعش متحرك .. فالبيجو اللي ركبت فيه يومها كان نعش متحرك عليه فرن غرضه تسوية الركاب على الجنبين..
وإيه .. محدش حيراجع وراك يا سواق في أرضك يا مصر .. حتى لو ولع السواق عود كبريت في قلب العربية اللي لسة ممونها بنزين!
وسلم لي على حزام الأمان .. واللي بيتعاطوه!
دنيتى
أه والله على رأيك
حلم
وان شاء الله العته هايفضل موجود طول ما بيحطوا زبالة فى دماغنا من التعليم بتاع مصر ده
ندى يا تحفة
إنتى متأكدة انك عاملة كومنت على الموضوع ده ولا على موضوع تانى ؟
:D
مش عارف عندى احساس انك كنتى بتكتبى الكومنت ده وكنتى لسة مخلصة هوايتك المفضلة اللى هى النوم
على العموم حاضر هاظبطلك البلوج عندك وعايزك ترفعى راسى كدة
:D
ايه ده يا سويدي؟
انا متاكده اني علقت على البوست ده بعد تاتي!!ا
التعليق راح فين ؟انت بتمسح تعليقاتي ولا ايه؟
روووووووووووز
وانتى طيبة يا جميييييييل الله يخليكى
(F)
نووور
يا ابنى مش شرير والله ولا حاجة بس انت عارف الناس طالعة مقفلة وماعندهاش استعداد تفهم
فا انا كبرت دماغى انا كمان
قلم جاف
انا مكانى المفضل فى البيجو هى الكنبة الاخيرة عشان انام واتمطع
:P
بس طبعا البيجو بيبقى اخر حاجة افكر فيها بفضل اتوبيس او ميكروباص او طيارة
:D
منورنى
بسبسسسسس
هههههههههههه انتى موجودة فى نفس الوقت اللى انا موجود فيه
:D
لا والله ما مسحتش حاجة
ما اقدرش اصلا
:|
ده اول كومنت ليكى هنا
سويدي انا بعتلك الاغنية
كل سنة و انت طيب
وصلت يا تاتىىىىىى
شكراااااا يا جميل
وانتى طيبة
المرة الوحيدة اللي رحت فيها المنصورة كانت بالأتوبيس .
كانت أسوأ سفرية في حياتي .
ليه بس يا عبده؟
:D
تلاقيك رحتها وكان الجو حر بس شوية
بس هى عامة مدينة جميلة جدا وانا بحب اروحها اوى
حرام عليك كنت تقول لحد يالا اللي حصل حصل فكرتني باول يوم امتحان مكنتش لقيا لجنتي لفيت المدرسة كلها واللجنة طلعت في الدور اللي مرحتوش وصلت تسعة الا خمس دقايق وملقتش حد في اللجنة غيري كلهم كانوا تايهين في الحوش وبيعيطوا والموضوع ده اتكرر كتير علشان بينقلونا في اللجان شوفتوا كل حاجة بايظة جت ع الاتوبيس
نوران
اول زيارة ليكى منورة
ماهو انا عرفت ان اللى قاعد جمبى قاعد غلط فهمته ومش راضى يفهم ومصمم انه صح فا انا اتنرفذت وسبته هو والناس كلها يخبطوا فى بعض
:D
موضوع اللجان ده بيحصل كتير بس الحمد لله معايا انا ماحصلش خالص
:P
شكرا على مرورك
يا استاذ اركب البيجو من الموقف بتاعه
انا رحت و جيت عالمنصوره خمس سنين يا صاحبي
شرق الدلتا ده اقذر مواصله اتعملت
يا استاذ بص عالداكت بتاع التكييف اللي فوقك مليان صراصير صغيره !!
اوعي الستاره دي كلها امراض جلديه و ناس كتير اوي بتمسح فيها مناخيرها و ...
مره ركبت لقيت واحد مرجع و هو جاي مرجع تحتي و محدش نضف و محدش هينضف طبعا !!
يعني تقعد عالطراش لا مؤاخذه ده ان كان عاجبك تدفع 9 جنيه علشان تقعد عالترجيع !!! نعملك ايه يعني يا بيه !!
و لا الفيديو و الافلام الغريبه مش ناسي انا فيلم زمن الاقوياء و حاره برجوان اللي حفظت السيناريو الممل المكتوب اللي كرهني في نفسي و لا لما ظابط يركب الاتوبيس تلاقيه واخد كرسيين وحده ببلاش ... و ايه بقي كمان مش عاجبه مرجع الكرسي ورا عالاخر بمعني اصح بينام عليك ...
و ممكن تلاقي واحد تاني افتكر ان ده مش كرسي ده سرير ... مره حصلت معايا باقله يا عم الله يخيليك مش عارف اقعد قالي اعملك ايه ... المشوار طويل ... قلت له يعني علشان كويل انا اقعد طلعان عيني كده ؟ قال لي و انا اعمل لك ايه ...
و تطور النقاش ...
قال لي خليك في حالك
قلت له ما هو ده حالي
سكت و بص قدامه
قلت له هي بلطجه
قالي اه بلطجه
المهم الراجل ده فالاخر حاول يمد ايده .. راجل بتاع خمسين سنه بس قليل الادب قوي لما قام زقني سكت ... المهم كل ده السواق و المفتشين قاعدين مولعين سجاير و عاملينها غرزه قدام ...
و لا كأنه في حاجه ورا اللذيذ بقي انه الراجل ده اداني فرصه في النهايه اخد حقي لما شتمني بالام .. الحقيقه مش ناسي شكله لما جاب دم من مناخيره و ودانه و الناس عماله تقولي جدع يا بني يستحق ..
شفت المشاركه المعنويه ... كله بيشاركك معنويا ...
اما عن البيجو اللي باقلك اركبه فهو ايضا محفوف بالمخاطر لكن مش زي الاتوبيس هو احسن الوحشين ... يعني ما تخافش لما السواق يشرب حشيش ... ده بيصطبح بس ...و القطار ده طبعا مضمون جدا جدا جدا كلنا عارفين الخدمه الممتازه في القطارات في بلدنا
من الاخر حاول تدور علي شغل في اي مكان تاني و هنا سنتكلم عن المواصلات العامه ... تعالي احكي لك عن اتوبيس 14 اللي بيقعد يركب ناس من شبرا مرورا بالقاهره كلها حتي يصل الي مدينه نصر ...
انا بانزل فالعباسيه و مش عارف ليه الاتوبيس ده بيركب ناس و محدش بينزل ... فعلامحدش بينزل !!!
اقلك احسن حاجه نقعد في بيوتنا
او اشتري عربيه ... اه اشتري عربيه
و هنا نتحدث عن المرور و الرخص و الميكانيكي و الكهربائي و العفشجي او مركز الخدمه ...
مش عارف هو زمان في واحد باشا قال
مافيش فايده
يا سلام لو كان عايش الباشا دلوقت
اكيد كان قال ...
مالوش لازمه ...
هو مين اللي مالوش لازمه ؟؟
اكيد انا قصدي النزول من البيت طبعا !!!
انتوك
عذرا للاطاله
لكن انا هاكتب بوست عن البهدله اللي شفتها و باشوفها كل يوم في المواصلات
اعذرني انا دمي محروق قوي قوي من اللي بيحصل فيا ده
بالذات لما تلاقي نفسك مزنوق في اتوبيس
تخيل بقي لو مضطر كل يوم تتزنق كده !!
و لا مترو الانفاق ... الا صحيح هو الناس مش بتتنيل تستحمي ليه ؟؟
مش عيب انك تعرق بس لما تعرق و انت مستحمي غير لما تعرق و انت بقالك شهر ما قربتش من الميه !!! يا جدعان الميه ببلاش
يووووووووووووه طولت تاني فالكلام
حقك عليا يا عم انا دوشتك بس اصلها حاجه تقرف
انتوك
امال لو ركبت غرب الدلتا بقلى
أصله ملهوش حجز من اساسه
دة باللي يلحق
يااه ايه ده ده انتم عقدتوني من ركوب المواصلات مع ان كلامكم للاسف صحيح
وخاصه اتوبيس غرب الدلتل ده فعلا فظيع يمكن السوبر جيت احسن الوحشين مع انه ضيق والافلام فيه هي هي
أنا عن نفسي باحب القطر عنهم اسرع وانضف الي حد ما وخاصه التوربيني
اما بالنسبه للمواصلات عموما لا احتمل الأتوبيسات باتعب منها مترو الأنفاق أفضل والأفضل انك تركب عربيتك بكرامتك
ربنا يوعدكم
كراكيب
ما طولتش ولا حاجة بالعكس انتى موتنى من الضحك على مترو الانفاق واتوبيس
14
هههههههههههههههههههههه
اولا انا اتوبيس شرق الدلتا او غيره اول ما الاتوبيس بيتحرك اخوك بيروح فى النوم فا مش فارقة معايا الافلام ولا اى حاجة
:D
البيجو بقى لا اما انام برضو لا اما افضل اتفرج على الطريق لان البيجو غالبا بركبه وانا رايح بورسعيد او السويس او البحيرة
اما مترو الانفاق انا لسة نازل منه من حوالى ساعة الاربع يا دوب خدت دش وجيت اكتب الكومنت فا حسيت بكل كلمة قلتها ده غير انى اساسى بركبه كل يوم الصبح وانا رايح الشغل عشان اضمن ما يتخصمليش اليوم بسبب التأخير
مترو الانفاق ده انا اتخنقت منه لازم يركبوا فيه تكييفات مش هاينفع كدة والله
:s
اتوبيس
14
ده انا ما حصليش الارف وركبته الصراحة مش طريقى خالص
:D
تحياتى ليك انتوك
:)
ندى
انا برضو ماحصليش الارف وركبت غرب الدلتا ده غير مرة واحدة وحرمت الصراحة اتوبيس غير صالح للبنى ادمين اصلا كنت راكبه من مدينة السادات مش عارف ده غرب الدلتا ولا وسط الدلتا الاتنين اسوأ من بعض عامة يعنى
اسكندرية عامة بركبلها لا اما ميكروباص لا اما التروبينى
gogaaaaaa
حمد الله على السلامةةةةةة
ما عقدنكيش ولا حاجة بس هى دى فعلا حقيقة المرافق فى مصر فى عهد التطور والازدهار على يد فرعون انا اقصد طبعا فرعون بتاع الفراعنة عشان ماحدش يفهم غلط
:D
بس انا بعتب عليكى ازاى تقولى على مترو الانفاق افضل؟؟
شكلك كدة بتركبى مترو الانفاق بتاع اسبانيا او المانيا
:D
منورانى يا جوجا
ياد يا سويدي مش عايز احبطك بس بجد لو ركبت مترو الانفاق في اسبانيا انضف اتنين مليون مره من التربيني بتاعنا ويمكن من طائرات مصر للطيران
ياد يا نور انت رحت اسبانيا وانا معرفش؟؟؟
ثم انا اتحكالى قبل كدة واحبطت خلاص
:D
ابويا اللي كان هناك وحكالي لأ وجايبلي صور عشان يعقدني
دول عندهم حداش خط مترو في مدريد بس وكلهم بيتقابلوا في محطه واحده زي محطه مبارك عندنا:)
الناس غلابة
وكلهم فى الساقية مش عاوزهم يدوخوا فى دى كمان
نور
انت بتقارن مترو مدريد بمترو الانفاس بتاع الاموات بتاعنا ده؟
انت غريب اوى ياض يا نور
:D
طاهر
اه والله غلابة
سيبك انت منورنى والله
:)
دي أحد مظاهر السلبية المنتشرة في كل مجالات الحياة يعني اتوبيس شرق الدلتا فيه جيش جرار من الموظفين والمفتشين والمشكلة دي بقالها اكتر من عشرين سنة
بس يمكن من عشرين سنة كانت الاتوبيسات نضيفة ومكيفة والستاير برده والناس كانت نضيفة شوية
واضح ان الامور تطورت للاسوأ
شقير
للأسوأ واعتقد هاتستمر للأسوأ برضو
:D
شكرا يا محمد
المدونه منورة بيك
أنا قصدي ان مترو الأنفاق بتاعنا يعتبر أسرع وسيله
مش زي الأتوبيس اللي لو فكرت تركبه يبقي مش هتوصل شغلك
علي الأقل المترو مواعيده معروفه الي حد ما
أسبانيا ربنا يوعدنا و نروح نتعقد شويه
Christian Louboutin Short Boots
Christian Louboutin Spring Collection
Christian Louboutin Tall Boots
discount Christian Louboutin Boots
discount Christian Louboutin Pumps
discount Christian Louboutin Sandals
discount christian louboutin heels
discount Christian Louboutin Short Boots
discount Christian Louboutin Tall Boots
Christian Louboutin Boots Sale
Christian Louboutin Pumps sale
Christian Louboutin Sandals sale
christian louboutin heels sale
Christian Louboutin Short Boots sale
Christian Louboutin Tall Boots sale
Yves Saint Laurent boots
Yves Saint Laurent Pump
Yves Saint Laurent Sandals
http://www.christianlouboutinshoes88.com/
Post a Comment
<< Home